Kaos në trafik. Vlorë, pushuesit "plazh" në makinë

Vlorë Gusht 11,2012 - 13:25 - Të ecësh me makinë përgjatë vijës bregdetare të Vlorës është sfilitëse. Që nga skela dhe përtej ujit të ftohtë, trafiku është kthyer në gangrenën e pushuesve. Duke qenë se zona e shkollës së Marinës është e ndotur, pushesit preferojnë plazhet drejt Radhimës, por duhet minimumi një orë për të shkuar në mëngjes dhe më shumë se një orë për t'u kthyer pasdite. Vonesën në trafik e bëjnë të papërballueshme temperaturat e larta deri në 40 gradë të ditëve të fundit.

"Si refugjat të flas tani. Është shumë e ngarkuar, problematike. Duhet vënë pak dorë më shumë. Ç'të të them",-thotë një drejtues mjeti.

"Shumë i ngarkuar është. Nuk është në rregull. Sigurisht që duhet të kishte një zgjidhje",-shprehet një tjetër.

"Shumë e vështirë është. Ne që udhëtojmë andej e kemi shumë të vështirë për të udhëtuar. Duhet të zgjidhet nga qeveria, sepse kështu nuk shtyhet më. Kam një orë nga hyrja e Vlorës deri këtu",-theksoi një tjetër.

"Është shumë keq. Ka shumë trafik dhe nuk ka një rregull",-thotë një tjetër shofer automjeti.

Drejtuesit e qarkullimit rrugor e justifikojnë trafikun e rënduar me numrin e madh të automjeteve në qytet si edhe me faktin që Vlora ka vetëm një rrugë kryesore përgjatë bregdetit. Zgjerimi i tunelit në ujin e ftohtë lehtësoi disi qarkullim, por nuk mund të përballojë fluksin e automjeteve gjatë verës.
Festim Llanaj