02 gennaio 2018

Mali i Shoshit, kartolina e turizmit dimëror 2018

Arrow
Arrow
Posted on 09:05 - 2 Janar 2018
TIRANË, 2 Janar / ATSH-N.Lena / -“ Shqipëria është plot me male, male ka edhe Tirana. Edhe në Dajt bie bore, por asnjë mal në Shqipëri, nuk është më atraktiv dhe më i përshtatshëm për zhvillimin e turizmit dimëror sesa Mali i Shoshit”,  më fliste me pasion këtë fillim viti një miku im malësor i këtyre anëve.
Për të kapur këto maja, mund të ndjekësh rrugët nëpër mal, të hapura dikur nga ndërmarrjet e sharrave.
Ato kanë krijuar labirinte të shumta, mjaft të përshtatshme për shëtitje në dëborë, jo vetëm për kategorinë e turistëve të ecjeve malore por për të gjitha moshat. Rrëpira jo të rrezikshme, të përshtatshme për pista të vogla skijimi. Ish-sektori i sharrave, por edhe livadhe të tjera për kampingje verore e dimërore e njësi të tjera akomoduese e shërbyese.
Prani të shumta të kafshëve dhe shpendëve të egër, shtojnë kuriozitetin e vizitorit.
Bora e pranishme deri në 6 muaj dhe rruga asnjëherë e bllokuar për kohë të gjatë, mundësojnë aktivitetin turistik në këtë zonë.
Por, është një rrugë më e shkurtër  për në këto lartësi të bukura, ajo që kalon për Luginën e bukur të Kirit, rruga që çon në dy fiset legjendare Shosh e Shalë, me atraksione turistike të shumta e të mrekullueshme dhe rruga tjetër që të nxjerr në  Theth,por që shpesh bëhet e vështirë  nga bora e Qafë T’Thores. Është 12 km. rrugë që nuk është trajtuar akoma.
Rapsodi dhe vet historia i ka kënduar këtij vendi të bukur e me tradita që tashmë po tërheq vëmendjen e vizitorëve aventurierë të lartësive.
Për këto male mblue me borë
Shala në shekuj ka kenë Orë
N’daç për vepra e n’daç me fjalë
Dukagjini nis prej n’Shalë…
Investimet private dhe futja e kësaj zone në axhendën turistike të vendit, po sjellin zhvillimin  e një turizmi të qëndrueshëm në Shalë e Shosh. Kullat e moçme si kala prej guri, në themel të tyre ngul fort tradita, mikpritja, besa e burrnia, monumentet e shumta kulturore, historike e natyrore, flora dhe fauna tepër e pasur, bëjnë që Dukagjini të jetë thesar i atraksioneve turistike aq shumë të kërkuara nga dashamirësit e turizmit malorë vendas e të huaj.
Me iniciativë individuale, atje sot, ka një bujtinë, e cila përbën një shpresë që në pranverën e ardhshme do të pasohet edhe nga të tjera, dhe njëkohësisht, është një thirrje e fuqishme për mbështetje nga organizmat shtetërore dhe shoqatat vendase e të huaja.
Janë disa kulla tradicionale malësore që tashmë janë kthyer në bujtina pritëse për vizitorët e çdo stine.
Investimet e disa prej banorëve vendas si Pal Binoshaj, për ta zhvilluar ekonominë e tyre në fushën e turizmit duke  kthyer kullat në mikpritëset e para  të turistëve, prej në Qafë të Ndërmanjës, Nderlysa, në Qafë të Agrit e deri në Mal të Shoshit.
Edhe pistat e skive në këto shpate pothuajse janë gati, ato veç duhen sistemuar dhe trajtuar si të tilla.
Slider
/a.g/
https://www.ata.gov.al/mali-i-shoshit-kartolina-e-turizmit-dimeror/

Në bazë të  Nenit 4 të ligjit për funksionimin e Agjencisë Telegrafike Shqiptare, ndalohet kopjimi, riprodhimi dhe publikimi i informacionit pa cituar burimin.

Viti i Skënderbeut, Muzetë e Krujës të gatshëm për numrin në rritje të vizitorëve

Posted on 09:10 - 2 Janar 2018
TIRANË, 2 Janar/ATSH-Maela Marini/.- Viti 2018 është shpallur si Viti Mbarëkombëtar i Gjergj Kastriot Skënderbeut, ndaj Muzeu Kombëtar “Gjergj Kastrioti Skënderbeu” dhe ai Etnografik në Krujë janë përgatitur maksimalisht për t’iu përgjigjur sa më mirë numrit gjithnjë në rritje të vizitorëve.
Për vitin 2017, numri i përgjithshëm i i personave që kanë vizituar këto muze shkon në rreth 105 mijë vizitorë, prej të cilëve gati 30 për qind janë turistë të huaj. Për vitin që kaloi vihet re një shtim me 5-7 mijë persona i numrit të vizitorëve, krahasuar me vitin 2016.
Në një intervistë për ATSH-në, Mehdi Hafizi, drejtori i Muzeut Kombëtar Gjergj Kastrioti Skënderbeu dhe atij Etnografik, Krujë, detajon disa nga përgatitjet që po bën stafi i këtyre muzeve për t’iu përgjigjur denjësisht të gjitha pritshmërive të vizitorëve në vitin 2018.
Sipas tij, Kruja ka një turizëm gjithëvjetor, pasi është e favorizuar nga vlerat që mbart, por edhe nga vendndodhja. “Stafi i Muzeve të Krujës ka treguar gatishmëri maksimale për t’i pritur vizitorët me kulturë dhe profesionalizëm. Kjo ka bërë që numri i vizitorëve të ketë një rritje 5-7 mijë më shumë se viti paraardhës dhe numri i përgjithshëm për vitin 2017 të shkojë rreth 105 mijë vizitorë, te kategorive të ndryshme”, tha ai.
Në Muzeun Kombëtar Gjergj Kastrioti Skënderbeu ka sinjalistikë turistike në gjuhët shqip-anglisht, ndërsa në Muzeun Etnografik informacioni i përgatitur jepet në 12 gjuhë të huaja. Gjendja e të dy Muzeve si brenda dhe jashtë, sipas drejtorit Hafizi, “është përmirësuar në vazhdimësi”.
Për të pasur një përfaqësim sa më dinjitoz në kuadër të Vitit Mbarëkombëtar të Gjergj Kastrioti Skënderbeut, Hafizi thekson se do të ishte pozitive nëse bëhen përpjekje për të mundësuar ekspozimin për një periudhë të caktuar kohore në këtë Muze, të armëve të Heroit tonë kombëtar.
Po ashtu, ai sugjeroi hapjen në ambientet e Muzeut të një ekspozite me vepra origjinale të piktorëve shqiptarë kushtuar Gjergj Kastrioti Skënderbeut, për një periudhë 6- mujore, vepra të cilat ndodhen në fondin e Galerisë Kombëtare të Arteve.
Me interes, sipas Hafizit, do të ishte që objektet e periudhës mesjetare që gjenden në Muze të tjerë në vend, gjatë vitit 2018, të ekspozohen në këtë Muze.
“Në Muzetë e Krujës, ne kemi dhjetëra eksponate që tërheqin vëmendjen e turistëve të huaj, por mund të themi që historia e Skënderbeut dhe veprat e artit zgjojnë interes në Muzeun Gjergj Kastrioti Skënderbeu, ndërsa në Muzeun Etnografik zejet, mënyra e jetesës dhe e gjithë banesa”, tha ai.
https://www.ata.gov.al/video-viti-i-skenderbeut-muzete-e-krujes-te-gatshem-per-numrin-ne-rritje-te-vizitoreve/

Në bazë të  Nenit 4 të ligjit për funksionimin e Agjencisë Telegrafike Shqiptare, ndalohet kopjimi, riprodhimi dhe publikimi i informacionit pa cituar burimin.

Search

Translate