27 agosto 2012

7 mijë turistë në Lezhë, interes për varrin e Skënderbeut 08/2012


Lezhë - Lezha mbetet destinacion i turizmit kulturor, me mbi 7 mijë turistë që kanë vizituar këtë vit qytetin. Kalaja e Lezhës dhe vendvarrimi i Skënderbeut janë dy objektet më të vizitueshme pasi çdo vit numri i vizitorëve kryesisht në memorial arrin në mbi 10 mijë. Sipas statistikave zyrtare, numri i turistëve të huaj ka qenë rreth 1000 në vitin 2010, 1500 vitin e kaluar; ndërsa këtë vit ka arritur në 1650. Vizitorët më të shumtë janë nga Kosova, Maqedonia dhe Mali i Zi. Ndërsa turistët e huaj vijnë nga Evropa Perendimore, por nuk kanë munguar as turistët kanadezë dhe australianë.

"Duke qenë viti i 100 vjetorit të pavarësisë memoriali i Skënderbeut sëbashku me kalanë mesjetare të Lezhës kanë qenë dy pikat kryesore të vizitueshmërisë nga vendas dhe të huaj. Këto vizita tregojnë rëndësinë e madhe që ka marrë memoriali i Skënderbeut, që i kushtohet dy ngjarjeve historike, Kuvendit të Lezhës dhe varrosjes së Skënderbeut"- thotë Halit Kavaja, Specialist i Monumenteve.

Në Qarkun e Lezhës numërohen 34 monumente natyre dhe 21 objekte  muzeale, arkeologjike dhe historike. Por Lezhës i mungon një muze historik- etnografik dhe arkeologjik, i cili vlerësohet se do t'i jepte një hov të ri zhvillimit të turizmit, pasi mbi 810 objekte kulturore e etnografike vazhdojnë të jenë në katin përdhes të Bibliotekës së Lezhës, pa u vizituar nga askush.


Lindita Koka

Nessun commento:

Posta un commento

Search

Translate