Parku Kombëtar Zall-Gjoçaj, atraksioni turistik i Matit

By Nikolla Lena

Posted on 11:06 - 6 Tetor 2017

TIRANË, 6 Tetor / ATSH / – Parku Kombëtar Zall-Gjocaj shtrihet në trevën e Matit brenda territorit të Bashkisë Mat të qarkut Dibër.

Parku Kombëtar Zall Gjoçaj është shpallur ParkKombëtar në vitin 1996.Dallohet për një biodiversitet me vlerë ndërkombëtare, larmi habitatesh, llojësh bimore e shtazore dhe pjesë të pyjeve natyrore, livadhe, përrenj etj.

Në park takohen halorë ndër më të pasurit e vendit tonë. Grumbuj pyjorë të përbërë nga ahu, arneni, rrobulli, bredhi, hartina, pisha e zezë etj.

Në territorin e parkut rriten mjaft bimë të rralla e të kërcënuara, bimë endemike e subendemike që deri diku mbeten të kërcënuara.

Fauna e parkut është tipike e zonave malore. Takohen gjitarë të mëdhenj e të mbrojtur si ariu, ujku, rrëqebulli, dhia e egër, kaprolli, derri iegër, etj. Ndër shpendët veçohet shqiponja, gjeli dhe pula e egër, skifterët etj.

Parku Kombëtar i Zall Gjocaj është zonë e rëndësishme bimore, që paraqet pasuri të veçanta botanike dhe mban një ansambël të madh të specieve të rralla të kërcënuara endemike me një vegjetacion të një vlere të lartë botanike.

Është klasifikuar si zonë e rëndësishme bimore sipas kriterit B, që ka për qëllim konservimin e zonave me një pasuri të lartë botanike, e rëndësishme për biodiversitetin e bimëve dhe organizmave që popullojnë atë. Përveç vlerave shkencore, parku njëherazi ka vlera të mëdha estetike, peizazhore, turistike të preferuara për vizitorët vendas dhe të huaj.

Pasuritë natyrore dhe biologjike, bukuritë e peizazhit afrojnë potenciale të mëdha për zhvillimin e ekoturizmit, turizmit malor, turizmit të aventurës etj, si burim shumë i rëndësishëm të ardhurash për parkun dhe banorët vendas, të cilët, si burim kryesor të ardhurash, kanë vetëm blegtorinë.

Së shpejti, me ndërtimin e Rrugës së Arbrit, ky parkdhe krejt zona do të futen fuqishëm në axhendën turistike shqiptare. Infrastruktura rrugore e dëmtuar e ka lënë këtë zonë disi jashtë itinerareve turistike të vendit./m.m/https://www.ata.gov.al/parku-kombetar-zall-gjocaj-atraksioni-turistik-i-matit/

Vjeshta dhe turizmi i peisazhit… zona e Kukësit nga më tërheqëset

By Nikolla Lena

Posted on 09:38 - 7 Tetor 2017

TIRANË, 7 Tetor / ATSH-N.Lena / – Turizmi i peisazhit është turizmi më interesant që zhvillohet në botë dhe së fundmi edhe në Shqipëri.

Kryesisht, ky turizëm zhvillohet në zonat me pyje dhe në parqe të mbrojtura, zhvillohet në të katër stinët, por më të preferuarat janë pranvera dhe vjeshta.Po të ngjitesh këto ditë në lartësitë e Thethit, Valbonës, në zonën e Kukësit apo Parkun Kombëtarë Shebenik-Jabllanicë, do të përballesh me një peisazh që po ndryshon ngjyrë.

E verdha vjeshtore ka filluar të dominojë. Po të ngjitesh në lartësitë e pyjeve në zonën e Kukësit, ky peisazh ka filluar të tërheqë turistët e stinës.

Pikat turistike po bëhen të frekuentueshme nga natyralistë dhe turistë të aventurës, si ajo e Kroit të Bardhë, Shishtavecit apo Novosejit, që janë pranë qytetit të Kukësit.

E tillë është edhe pika turistike malore pranë Gurit të Mëngjesit në Shishtavec, banorët e të cilit janë të njohur për mikëpritje dhe gatimin karakteristik të zonës.

Një tjetër pikë turistike është edhe Pylli i Mështeknave, ku thuajse çdo ditë janë të pranishëm vizitorë të ardhur nga zona të ndyshme si dhe nga Kosova.

Nuk janë vetëm këto pika turistike, është edhe Sasati, Kroi i Kuq, Kroi i Bardhë që kanë nisur të vizitohen jo vetëm gjatë verës, por edhe gjatë stinës së vjeshtës dhe dimrit.

Shumë vizitorë kanë mësuar edhe për vende që ndodhen jo shumë larg si, Kroi i Bardhë, Kroi i Kishës dhe Kroi Tatzot që vizitohen vetëm nga të pasionuarit pas alpinizmit kryesisht në dimër.

Kjo ka çuar në shtimin e numrit të banesave turistike në zonat rurale dhe në lartësi.

Po ashtu, në rrethin e Kukësit ofrohet kategoria e tretë e zonave të mbrojtura, Monumentet e Natyrës: Mështekna e Shishtavecit, Guri i Mëngjesit, Kroi i Kuq, Guri i Shqipes, Pylli i Dushkut në Novosej, Gryka e Çajës, Cirku akullnajor i Zepës, Vargëmalin Koretnik-Gjallicë- Kolesian- Kallabak-Tërfojë etj.

Të gjitha këto ofrojnë mundësi të mira për të kënaqur vizitorët dhe të pasionuarit ndaj natyrës dhe vlerave kulturore të zonave ku ato bëjnë pjesë. /a.ke/https://www.ata.gov.al/vjeshta-dhe-turizmi-i-peisazhit-zona-e-kukesit-nga-me-terheqeset/

Një tjetër Tourism InfoPoint do të jetë në dispozicion të turistëve në Radhimë

By Almarina Gegvataj

Posted on 18:59 - 6 Tetor 2017

TIRANE, 6 Tetor/ATSH/- Një tjetër qendër do të jetë në dispozicion të turistëve në Radhimë.  Gjatë përurimit të kësaj qendre zhvilluar sot në Vlorë, u prezantuan edhe 3 modelet e Qendrave të reja të vizitorëve që do të vendosen në Parqet Kombëtare të Llogarasë, Divjakë-Karavasta dhe Dajtit me mbështetjen e Bashkimit Evropian, përmes projektit NaturAl.

Të pranishëm në ceremoni ishin Ministri i Turizmit dhe Mjedisit Blendi Klosi, autoritetet vendore të Vlorës, partnerët për zhvillim, rejnxhërsat e Administratës vendore të Parqeve dhe përfaqësues të komunitetit.

Të pranishmit, vlerësuan bukuritë natyrore, biodiversitetin dhe ekosistemet në zonat e mbrojtura të Shqipërisë si destinacione të rëndësishme turistike.

Gjatë aktivitetit u theksua se qendrat e reja do të ofrojnë shërbim dhe informacion cilësor për turistët vendas dhe të huaj.

Një ekspozitë në mjediset e Qendrës së Vizitorëve në Llogara promovoi rëndësinë e mbrojtjes së mjedisit natyror, duke vënë në pah vlerat dhe përfitimet që i sjellin komunitetit dhe shoqërisë në tërësi. /a.g/ https://www.ata.gov.al/perurohet-ne-radhime-qendra-e-vizitoreve/