Turizëm- Lukova, nga më të bukurat e bregut shqiptar

Posted on 10:23 - 10 Maj 2014 by Nikolla Lena

TIRANË,10.Maj /ATSH.N.Lena /-Lukova, perla e bregut të Jonit, ku gjelbërimi i pafund bashkohet në harmoni të plotë me ngjyrën e kaltër të detit Jon, ku klima bregdetare gërshetohet mrekullisht me klimën malore, ku aroma e portokallit dhe e luleve shumëngjyrëshe lodron në krahët e flladit të shëndetshëm të detit Jon, ju mirëpret për të zbuluar nga afër mrekullitë e saj dhe ju premton një verë të paharrueshme. Lukova është një ndër fshatrat karakteristike të bregdetit shqiptar. E vendosur vetëm 21 km larg qytetit të Sarandës në një pozitë mjaft të favorshme gjeografike, ofron për pushuesit mundësinë e përzgjedhjes së një pakete mjaft të kombinuar pushimesh. Në një Shqipëri ku distancat po zvogëlohen përditë Jugu i vendit po bëhet gjithmonë dhe më i prekshëm. Lukova është e pozicionuar midis qyteteve të Sarandës dhe Himarës, jo më larg se 30 minuta udhëtim, nga këto dy pika. Fshati shtrihet në dy kodra të veshura me plantacione ullinjsh dhe portokallësh në një lartësi prej 150 m nga bregu i detit dhe në bregdetin e saj të gjerë strehon një numër të madh plazhesh të përmasave të ndryshme, duke filluar që nga plazhet e vogla me një atmosfere tejet intime deri tek plazhet popullore e festive të mirënjohura tanimë për pushuesinë shqiptare, si plazhi i Shpellave dhe ai i Bunecit. Natyra e paprekur, uji i kristalte i Jonit me ngjyrën e veçante, fshati me kalldrëmin e tij karakteristik, me shtëpitë e tij tipike me muret mbuluar me lule, plazhet e arta, flora dhe fauna e pasur detare janë vetëm disa nga sekretet që ju duhet patjetër të zbuloni këtë verë.

Lukova është komuna me vijë bregdetare më të gjatë  e bregut të Jonit shqiptar, 18 kilometër gjatësi ku janë plazhet e Borshit, Bunecit, plazhi i Shpellave, i Kakomesë, Krorëz, gjire të virgjër që u kanë shpëtuar ndërtimeve pa leje. Drejt jugut të ngrohtë, përmes rrugës nacionale të Bregut, mbërrinë  fare lehtë në Lukovë.
Lukova i ka gjurmët e historisë së saj në thellësitë e shekujve. Janë mbi 25 breza që jetuan në shekuj historinë e tyre në këto troje. Kufizohet më fshatrat Sasaj e Piqeras, Hundecace, Shën Vasil e Nivice, ku me këto fshatra ka pasur një mirëkuptim dhe bashkëpunim dhe duke mos pasur kufirin tradicional të çdo fshati.

Vendndodhja e saj e hershme është qyteza e Dhoknës në kodrat e Gjashnjarit që i takon shek. III – II p.e.r. Kjo qyteze u dogje nga komandanti romak Pal Emili në vitin 169 p.e.r. bashke me 70 qytete të tjera të Epirit. Figuron i dokumentuar në kadastrat e regjistrimit osman të vitet 1431 dhe 1582 me emrin Llukova. Nga Lukova ka qënë Shën Nimfoni, klerik i lartë në Kostandinopoje (Stamboll). Ai ka lindur rreth viteve 50 të shek. XIII. Fillimisht punoi prift në Manastirin e Mesopotamit.

Më 1310 – 1314 arriti gradën më të lartë : Patrik Ikumenik në Kostandinopojë. Pas vdekjes u shpall shenjtor i krishterimit. Lukoviotët kanë shërbyer si ushtar në Mbretërinë e Napolit. Për mbrojtjen e saj ranë 30 lukoviotë. Mbreti urdhëroi një kambane që u vendose në Manastirin e Krorzës. Është fshat i krishterë me tri kisha mes të cilave kisha e Shenepremtës e shek. XVII. Lukova nuk u përfshi në djegiet e Ali Pashë Tepelenës më 1798. Kundër turkut luftoi trimëresha lukoviote Kalina. Lukova ndodhet në listën e fshatrave të bregdetit që ka firmosur letrat drejtuar Papës së Romës dhe Caricinës Ruse si dhe mbretërisë së Napolit e të Venedikut që i quante këto fshatra pronë e tij.

Një udhëtim në Lukovë nuk është vetëm një kënaqësi e shijimit të bregdetit të bukur,të plazheve mahnitëse,të natyrës së gjelbërt,por vizitori mund të njihet edhe me shumë vpra historike,monumentale dhe të kultit.Në Lukovë mund të zhvillosh një turizëm bregdetar,natyror dhe kulturorë. http://www.ata.gov.al/turizem-lukova-nga-me-te-bukurat-e-bregut-shqiptar-106961.html