Shtatë kisha do t’i nënshtrohen restaurimit, 100 mijë EURO fonde

NGA DHURATA HAMZAI

18 Korrik 2014 - 03:02

TIRANE- Këshilli Kombëtar i Restaurimit, mes Monumenteve të Kulturës që priten t’i nënshtrohen restaurimit, ka përzgjedhur shtatë objekte kulti. Një nga projektet e përfshira në këto objekte kulti është edhe shpella me piktura në Kostar. Gjashtë të tjera janë kisha, monumente kulture të kategorisë së parë.

Këto kisha prej vitesh janë bërë problem nga specialistët “që duhet ndërhyrë në mënyrë urgjente”, por sipas drejtuesve aktualë të Ministrisë së Kulturës, ish MTKRS nuk bëri asgjë për restaurimin e tyre, të cilat si shumë monumente të tjera të kulturës u lanë në harresë. Drejtoresha e Përgjithshme për Trashëgiminë dhe Diversitetin Kulturor, Zhulieta S. Harasani, thotë se “restaurimi për kishat do të filloj menjëherë dhe MK e ka gati fondin për restaurimet”. Harasani ka deklaruar edhe fondet për projektet e restaurimit: Kisha e Shën Spiridhonit, Vuno, Himarë, sipas preventivit arrin vlerën 10,741,353 lekë; Kisha e Shën Thanasit, Peç, Delvinë arrin vlerën 535,710 lekë. Projekti për Kishën e Shën Mërisë Kameno, Delvinë ka vlerën 841,914 lekë.

Projekt i “Ndërhyrjeve emergjente në Kishën e Shën Thanasit”, Muzinë, Delvinë arrin vlerën 992,310 lekë. Ndërhyrja emergjente në Kishën e Shën Triadhës, Kardhikaq, Delvinë kërkon një buxhet prej 878,806 lekësh. Projekt për kishën e Shën Mëhillit”, Kostar, Mesopotam, Delvinë arrin vlerën 95,962 lekë dhe projekt i Shpellës me piktura, Kostar, Delvinë kërkon një buxhet 301,430 lekë. Shuma e përafërt është 14.4 milionë lekë ose 100 mijë euro.


Shkrimi u botua në Shqiptarja.com (print) në 18 Korrik 2014

Redaksia Online
(d.a/shqiptarja.com)   - See more at: http://www.shqiptarja.com/kulture/2730/shtate-kisha-do-ti-nenshtrohen-restaurimit-100-mije-euro-fonde-227468.html#sthash.vpAScXr2.dpuf