19 luglio 2014

Bregdeti i Darëzezës (Fier), i harruar nga pushteti vendor dhe institucionet

Bregdeti i Darezeses, Fier Foto Rrapo IsufajFier, 18 Korrik  /ATSH-Rr.Isufaj/ -  Komuna bregdetare e Ndërmënasit ne rrethin e Fierit këtë sezon turistik është ndjerë e braktisur nga institucionet dhe aktorët kontribues në fushën e turizmit. Kryekomunari i saj, Viktor Fasko, është shprehur me nota të ashpra ndaj apatisë dhe heshtjes  së institucioneve. Gjatë një takimi në këshillin e qarkut për zhvillimin e turizmit, ndryshe nga elozhet e kolegut të tij, kryekomunarit të Semanit, ai ka zgjedhur gjuhën e kritikës.
“Komuna e Ndërmënasit ka nën administrim një vijë bregdetare me gjatësi rreth 13,7 km ku spikat një plazh i mrekullueshëm, me rërë kurative dhe masiv pyjor, por askush nuk është kujtuar  për pastrimin, sistemimin dhe përmirësimin e infrastrukturës së tij”, tha  Fasko. Institucionet nuk zbatojnë detyrimet ligjore që kanë për promovimin dhe zhvillimin e turizmit, theksoi ai.
“Merr në telefon përfaqesuesit e policisë për të hartuar një plan të përbashkët veprimi për rritjen e sigurisë dhe qetësisë, nuk te pergjigjet kush, i kërkon CEZ –it të disiplinojë rrjetin e furnizimit me energji, heshtje. I kërkon Albpetrolit, institucioneve dhe grupeve vullnetare që të bëhen pjesë e pastrimit të plazhit ashtu si e atij të Semanit, s’të përgjigjen. C’ështe kjo neglizhencë institucionale. A thua se ky është plazhi im privat”, pyeti në mënyrë retorike Fasko.
Ai i ballafaqoi të gjithë përfaqsuesit e institucioneve me realitetin turistik të plazhit të Darëzesës dhe kërkoi një angazhim dhe bashkëpunim të menjëhershëm me programe të përbashkëta,  për të fituar kohën e humbur .
“Turizmi është një sektor që operon si një ansambël,  harmonia e të cilit prishet  në qoftë se një instrument  stonon”, theksoi ai. Në fund të takimit pas diskutimeve dhe marrjes së përgjegjësive nga secili institucion, u konkludua se kerkohet angazhim maksimal për përmiresimin e standardeve turistike në plazhin e Ndërmënasit dhe të të gjitha zonave të tjera bregdetare. /a.ke/http://www.ata.gov.al/fier-bregdeti-i-darezezes-i-harruar-nga-pushteti-vendor-dhe-institucionet-144906.html

Nessun commento:

Posta un commento

Search

Translate