17 luglio 2014

Shqipëria ofron gjithçka sipas New York Times


Shqipëria ofron gjithçka
‘New York Times‘ e ka renditur Shqipërinë të katërtën në listën e vendeve që duhen vizituar për vitin 2014.

Det, mal, liqen, lumë... qytete historike, vizita kulturore... Me pak fjalë, në vendin tonë mund të gjesh gjithçka, mjafton të kesh dëshirë dhe të jesh aventurier.

Nëse udhëton nga Tirana, ndalesën e parë mund ta bësh në Berat, vetëm 126 kilometra larg kryeqytetit. Në vendin që çdokush e njeh edhe me një tjetër emër: qyteti i një mbi një dritareve. I shumëdashur nga vizitorët, me mikpritjen karakteristike të beratasve e sigurisht duke shijuar gatimet tradicionale, duke filluar nga byreku me koçkulla, trahanaja e ashpër, rehania e rrushit apo pekmezi.

Me këngë e valle i presin skraparllinjtë miqtë, duke i kujtuar çdo të riu që ka lindur aty se në të ardhmen janë ata që duhet ta ruajnë e ta përcjellin me fanatizëm këtë kulturë. I njohur për rakinë, por edhe për kanionet e bukura të Osumit, vendalinjtë ftojnë gjithëkënd ta vizitojë natyrën e tyre të bukur e t’i gëzohet ecjes në lumë.

Është magjepsëse të shohësh kanionet nga lart, por është krejt tjetër gjë të shohësh lartësinë e tyre ndërkohë që je duke notuar në rrjedhën e lumit duke shijuar rrezet e diellit.

Përveç detit, kemi gjithçka tjetër! Me këtë thënie është çelur sezoni turistik në Përmet në maj të këtij viti. E duket se çdo qytet në Shqipëri ndër vite ka marrë edhe një emër të dytë. Qyteti i trëndafilave është quajtur ndryshe ky vend. Duket se ata që frekuentojnë ujërat termale të Bënjës, nuk shkojnë aty vetëm për t’u kuruar. Bukuria dhe pamja mahnitëse që ofron ky vend, i fton dhe i josh për t’u rikthyer sërish aty.

Siç thotë nje fjale e urte popullore, nuk ka se si mos të provosh ushqimin e përmetarëve e të mos lëpish gishtat.

Për ta bërë ditën më të bukur duhen provuar patjetër edhe emocionet e rafting-ut në Vjosë. Adrenalina është shumë e rëndësishme, por është gjithmonë e dyta në radhë sepse siguria nuk neglizhohet kurrësesi: “Të gjithë pajisen me skafandra dhe me jelekë shpëtimi edhe pse nuk i pëlqen kjo gjë. Guidat janë të specializuara pasi nëse nuk e njeh lumin, nuk duhet të hysh sepse merr në qafë njerëzit.”

Nëntor Oseku është gjakovar dhe është një nga vizitorët më besnikë të Shqipërisë. Rafting, ecje në ujë, ngjitje në mal... Preferon çdo gjë që ka të bëjë me natyrën dhe siç thotë ai, lidhja e tij me Shqipërinë është një dashuri që nuk po ka fund: “Jam jurist në Gjakovë dhe pasioni që kam për natyrën më ka ndihmuar të kompletoj pasionin tim. Unë relaksohem në fundjavë dhe të hënën kthehem në punë me energji.”

Tur në disa qytete, eksplorim i natyrës... Shqipëria na ofron gjithçka, duhet vetëm të kapim çastin dhe të gjejmë kohë për të udhëtuar. 

/ Top Channelhttp://www.top-channel.tv/artikull.php?id=281317

Nessun commento:

Posta un commento

Search

Translate