KUKËS/ TURIZMI: KUZHINA TRADICIONALE, USHQIMI VENDAS I PREFERUARI PËR TURISTËT

 KUKËS, 15 Nëntor/ATSH-R.Hoxha/.-Turizmi dimëror ka trokitur tashmë në pikat turistike të rajonit verilindor, ku banorët janë përgatitur për një fluks në rritje të turistëve. "Turizmi edhe në rajonin tonë është gjithëvjetor. Çdo ditë i kemi pranë turistët dhe përpiqemi t’ua plotësojmë dëshirat. Veçanërisht ata parapëlqejnë prodhimin dhe gatimin vendas”, thotë kryetari i komunës së Margegajt, Rexh Biberaj. 

      Gjithnjë e më tepër është duke u zgjeruar turizmi dimëror. Janë vetë turistët ata që e kanë zgjeruar hartën e pikave turistike, pas afrimit të kësaj zone me pjesën tjetër të vendit, përmes autostradës.

     Kështu ndodh edhe me zonën e Shishtavecit, në rrethin e Kukësit. "Vjen dimri dhe turistët vijnë për të shfrytëzuar pistat natyrale të skive. Për guzhinën, parapëlqejnë gatimin tradicional vendas si; mishin e pjekur, apo flinë, por edhe turshinë, apo djathin”, thotë një prej guzhinierëve të shumtë të kësaj zone, Mehmet Bala, i cili i është përkushtuar turizmit, prej të cilit ka të ardhura të mira. 
     Fluksi gjithnjë në rritje i vizitorëve ka sjellë edhe rritjen e interesit të fermerëve vendas, për shtimin e prodhimit bujqësor e blegtoral, sipas kërkesave e shijeve të vetë turistëve.  Kjo ka bërë që në këto pika turistike të ngrihen jo vetëm linjat e përpunimit të qumështit, por edhe të prodhimit të pijeve alkoolike, prodhimit të nën produkteve të mishit, etj.
     "Këtij qëllimi  po i shërbëjnë edhe minifermat blegtorale me 10-20 lopë, me synim furnizimin me qumësht dhe nën produktet e tij në çdo periudhë të vitit të mjediseve turistike”, thotë  kryetari i komunës së Shishtavecit, Dylejman Nela.          

     Ndërsa në komunën e Margegajt janë ngritur një varg rezervatesh të mbarështrimit të troftës. Kjo edhe për shkak se trofta, në lumin e Valbonës po shkon drejt zhdukjes, sikurse edhe 3-4 lloje peshqish që po zhduken në liqenin e Fierzës, për shkak të gjuetisë pa kriter./m.sh/s.s./