Media italiane: Në faqet e Rilindasit trashëgimia e arbëreshëve

T’u kalosh brezave të rinj një bagazh kulturor që vështirësisht mund të lexohet në faqe librash, por që rijeton vetëm në kujtesën e të moshuarve, dëshmi gojore që do të humbnin përgjithmonë: është ky –sipas mediave italiane – motivi kryesor i bashkëpunimit mes Rajonit të Basilikatës dhe të përditshmes “Shqiptarja.com” që duke filluar nga 1 korriku i dedikon në suplmentin e saj kulturor “Rilindasi” disa faqe pesë komuniteteve arbëreshë që ndodhen në këtë rajon të Italisë.

Sipas shtypit italian, “në këtë jo vetëm do të ruhet idioma kësaj minorance gjuhësore, por do të krijohet një lidhje e fortë kulturore mes territoreve lukane ku jetojnë pasardhësit e shqiptarëve të mbërritur në Itali mes shekullit të XV e XVII dhe vendit ballkanas”.

Çdo javë suplementi do t’i dedikojë një pjesë të faqeve kulturës, zakoneve dhe traditave të realitetit arbëresh. Numri i parë, që mund të shkarkohet falas nga faqja e BasilicataNet, përveç një përkthimi të dyfishtë në shqip dhe arbëresh, përmban edhe një editorial të kryeredaktores Admirina Peçi që prezanton iniciativën.

Çdo të hënë do të jetë e mundur të shfletohet PDF-ja e Rilindasit dhe artikujt e kulturës albanofone e asaj lukane.

(im/shqiptarja.com)