“Anakondë” në liqen, përhapet panik mes pushuesve në Kukës,Albania

Kukësi 4/7/2012 është qyteti i vetëm në Shqipëri që ka fatin të rrethohet nga të tria anët me ujërat e liqenit, duke formuar një gadishull tepër tërheqës dhe të veçantë. Por në këto ditë të nxehta syri të zë fare pak ose aspak pushues në brigjet e liqenit. Mungesa e kushteve për frekuentimin e liqenit, papastërtitë në brigje, mungesa e ambienteve për shërbim, por dhe ndarja me autostradë e liqenit, ku mungojnë mbi e nënkalimet, po i mbajnë larg ujit të pastër e tërheqës banorët e Kukësit. Grupe të vegjël fëmijësh dhe adoleshentësh e thyejnë heshtjen në këto ditë vape. Më çanta me bukë me vete dhe me guximin e moshës ata janë rekordmenë në sportin e tyre, duke u hedhur nga lartësitë mbi 15 metra nga ura e Drinit të Zi. “Marrim bukë me vete dhe çdo ditë vijmë në liqen. Uji është i pastër por në brigje ka ferra, papastërti. Shumë shokë tanët kanë frikë të vijnë sivjet për t’u larë se nuk i lënë prindërit, por kanë dhe vetë frikë. Thuhet se është parë një gjarpër i madh anakondë dhe të gjithë kanë frikë, por unë jo”, thotë Miri. Në të vërtetë këtyre fjalë që kanë përhapur panik në qytet u përgjigjen specialistët, të cilët thonë se nuk ka asnjë kafshë të rrezikshme dhe të vetmet kafshë në liqen janë peshqit. “Ujërat rezultojnë të pastra kimikisht. Janë bërë analizat kimike në pesë pika të ndryshme dhe rezulton se ujërat janë të pastra. Sa u përket thashethemeve për anakondë, janë krejt absurde. Do ishte një mrekulli e shkencës biologjike apo një rast i jashtëzakonshëm që këto ujëra të kishin një anakondë apo dhe një gjarpër tjetër të madhësive të tilla. Kafshët më të mëdha në këto ujëra janë peshqit që kanë shkuar deri në 67 kg, ballëgjeri. Nuk ka asnjë kafshë të rrezikshme që rrezikon jetën e atyre që lahen në liqen”, pohon biologu Arben Palushi. Liqeni i Kukësit u mbulua nga mbeturinat gjatë kohës së reshjeve, të cilat janë larguar nga rrjedha, duke mbetur vetëm nëpër brigjet e tij.http://infoshqip.al/anakonde-ne-liqen-perhapet-panik-mes-pushuesve-ne-kukes/