Dhërmiu pa mjek, emergjencat drejt Vlorës...

Dhërmiu pa mjek, emergjencat drejt Vlorës,Publikuar: Qershor 15,2012 - 13:48

Vlorë - Plazhi i Dhërmiut nuk ka asnjë mjek apo qendër shëndetësore që mund t?u vijë në ndihmë mijëra pushuesve në rast urgjence. Për çdo sëmundje apo emergjencë pacientët duhet të udhëtojnë gjatë deri në Vlorë. Për drejtorin e Spitalit të Vlorës qëndrimi i një mjeku në këtë zonë, është domosdoshmëri, qoftë edhe për të dhënë vetëm ndihmën e parë në rast nevoje. Organika për të shtuar një mjek në Dhërmi mitatohet nga Ministria e Shëndetësisë.

"Kemi dhe një projekt tjetër që faktikisht do ta diskutojmë dhe një herë tjetër në ministri, mendimi im ka qenë që atje mund të stacionohet një qendër ambulante që të ketë një mjek të përgjithshëm dhe një mjek mikrokirurg. Për një problem të caktuar që mund të ndodhë në raste të veçanta të jepet ndihma e parë atje, se të vish në Vlorë është larg", tha Shkëlqim Selami, Drejtor i Spitalit të Vlorës.

Ndërkaq në spitalin e Vlorës, për ti paraprirë fluksit të pritshëm për shkak të rritjes së temperaturave dhe numrit të lartë të pushuesve, do të dublohen oraret e stafit mjekësor. Shërbimi i Urgjencës do të vërë në dispozicion një autoambulancë që do të jetë në lëvizje nëpër plazhet e Vlorës.
http://news.albanianscreen.tv/pages/news_detail/40312
Festim Llanaj