Rrëshqet dheu. Teatri i Apollonisë në rrezik

Fier - Publikuar: Dhjetor 04,2012 - 22:39

Rrëshqitjet masive të dheut dëmtojnë rëndë Parkun Arkeologjik të Apollonisë. Rreshjet e dy ditëve të fundit kanë bërë që mbi një e treta e Teatrit Antik është mbuluar nga rreth 100 metra kub dhé. Kjo është hera e dytë që teatri mbulohet nga dheu, pas rrëshqitjes së ndodhur në vitin 2010.
Ekspedita gjermano-shqiptare e cila ka pastruar dhe niveluar teatrin dy vitet e fundit, për ta bërë atë të vizitueshëm, ka dështuar sërish për të mbrojtur rrënojat, edhe pse siguroi që rrëshqitjet e dheut nuk do të përsëriteshin.
Drejtori i parkut Marin Haxhimihali, thotë se në zonën e teatrit antik ka burime të nëndheshme uji të cilat e bëjnë shumë problematike hapësirën. Sipas tij, për zgjidhjen e situatës së dy viteve më parë nuk u mor parasysh as studimi i Shërbimit Gjeologjik Shqiptar. 
Aleksandër Nushi