Himarë, 30 qershor/ATSH-Harilla Koçi/.- Në muajin maj të vitit 2004, valët e detit nxorrën në një nga plazhet e Himarës trupin pa jetë të një delfini të vogël. Një mjet lundrues, anije transporti, apo target, e kishte goditur atë fatalisht. Banorët e kësaj zone e panë me kureshtje këtë banor të rrallë të detit, që nuk ishte shfaqur ndonjëherë më parë në këtë pjesë të bregut. Lajmi u amplifikua nga media si një ngjarje e pazakontë. Në fakt, ky ishte edhe rasti i parë që mjedisi ku u gjet ky banor i hapësirës detare dhe që sot njihet me emrin “Plazhi i Llamanit”, zuri një hapësirë modeste në median kombëtare.
“Plazhi i Llamanit” është një nga ato vende që është shndërruar në një nga epiqendrat e zhvillimit të turizmit në Rivierën Shqiptare. Ai ndodhet rreth 5 km në jug të qytezës së Himarës, në një largësi prej më shumë se 75 km nga Vlora dhe është i vendosur mes disa kodrave të larta që zbresin butë deri në breg të detit.
-Llamani, plazhi që është transformuar-
Plazhi ka një hapësirë prej disa mijra metrash katrorë. Zallishtja e imët, uji i kthjellët dhe i pastër si kristali, perceptohen lehtësisht nga njerëzit që vijnë këtu për herë të parë. Gjithçka të bën për vete. Nëse vendos të vish një herë, nuk mund të mos kthehesh sërish. Ky kënd i fshehur disi, në bregdetin e Himarës, është ndjellës. Mbart mbi vete kërshërinë që e nxit njeriun ta eksplorojë. Në këtë pikë, vizitori gjendet mes detit, malit dhe qiellit që duket se tentojnë të bashkohen në një pikë të vetme. Askush nuk i ka rezistuar ndjesisë për ta shijuar nga afër këtë pjesë të bregdetit himariot. Pavarësisht se deri para pak vitesh kushtet ishin modeste, sot gjithçka ka ndryshuar. Struktura turistike është plotësuar në përputhje me standardet më të mira bashkëkohore. Në këtë plazh tashmë ka lokale, apo mjedise të tjera të nevojshme për pushim, është siguruar uji i pijshëm, që mungonte më parë. Pushuesit vijnë dhe do të vazhdojnë të vijnë. Sepse natyra këtu është treguar aq bujare sa, eklipson paksa edhe ato mangësi që ende nuk janë plotësuar.
Landi, një nga pronarët e strukturës turistike në këtë bregdet, thotë se ka investuar për të ndërtuar dhe për t’ju gjendur pushuesve. “Kemi plotësuar dhe po plotësojmë të gjitha kushtet që u nevojiten pushuesve për të kaluar ditë të këndshme në plazh”, tregon ai. Këtu nis sezoni në muajin qershor dhe përfundon diku nga fundi i shtatorit.
-Mungesa e rrugës, një problem shqetësues-
Rruga është një nga ato element që mungon këtu. Është një segment prej pak më shumë se 500 metrash, që lidh aksin kombëtar Vlorë-Sarandë me plazhin. Përmirësimi i kushteve të udhëtimit me ndërtimin e Rrugës së Bregdetit është shoqëruar me shumëfishimin e numrit të pushuesve dhe turistëve të huaj. Kjo pohohet nga banorë dhe drejtues të qeverisjes vendore të Himarës. Kryetari i Bashkisë së Himarës, Jorgo Goro, thotë se plotësimi i infrastrukturës rrugore, është një nga faktorët përcaktues në rritjen e numrit të pushuesve.
Një gjë e tillë është reflektuar edhe për plazhin e Llamanit. Por, pushuesit shprehen se do të ishte mjaft mirë të rregullohej edhe ky segment. Aktualisht, kjo rrugë është një gjurmë e paasfaltuar e mbuluar nga pluhuri dhe dheu. Sistemim asfaltimi i saj, është përfshirë në planet e afërta.
Bregdeti i Himarës ka një kapacitet akomodues prej 25-30 mijë shtretërish. Struktura turistike akomoduese përbëhet nga tre kategori, mes të cilave, ajo hotelerike, me rreth 3500 shtretërish, turizmi familjar, me rreth 15 mijë shtretër dhe, kategoria e përzier, ku, nuk ka një profil të saktë hotelerik, apo familjar. Bregdeti me gjatësi rreth 30 km ofron mjaft surpriza për pushuesit, ku përfshihet edhe Plazhi i Llamanit. Ai, bashkë me plazhet e vogla dhe shkëmbore të Porto Palermos, apo mjediset e virgjëra të Livadhit, të Gjipesë, të Potamit etj, formon zinxhirin e margaritarëve natyrorë të bregdetit të Jugut. /a.ke/ http://www.ata.gov.al/reportazh-himare-plazhi-i-llamanit-nje-nga-perlat-e-rivieres-136417.html
Nessun commento:
Posta un commento