Kepi i Rodonit, degradon Kalaja e Skënderbeut, vidhen sklupturat

03 GUSHT 2016 - 11:18 | PËRDITESUAR NË 11:42

Kalaja e Skënderbeut në Kepin e Rodonit një nga objektet më të rëndësishme të trashëgimisë kulturore po shkon drejt degradimit.

Kjo kala ka qenë shumë më e madhe, por për shkak të gërryerjeve të detit ndër shekuj një pjesë e mureve dhe disa nga objektet e saj kanë përfunduar në det.

Gërryerjet po vazhdojnë edhe sot madje me një intensitet më të lartë.

Në dimër dallgët e detit përfshijnë sipërfaqen e kalasë deri ne 2-3 metra lartësi, duke gërryer edhe ato pak mure të mbetura.

Deri me sot në Kalanë e Skënderbeut nuk është bërë asnjë lloj investimi.

Mungojnë restaurimet e pjesëve të dëmtuara dhe punimet mbrojtëse nga erozioni i detit.

Nuk mjafton vetëm shkatërrimi i objektit, por vite e fundit në këtë kala janë vjedhur disa nga skulpturat që ndodheshin në muret e saj.

Siç shihet në këto foto, duhen marrë masa urgjente që një ditë kjo kala të mos zhduket nga faqja e dheut.

Edhe pse ka degraduar në këtë gjendje, bukuritë mahnitëse te Kepit të Rodonit dhe ky objekt historik me aq sa ka mbetur, po tërheq çdo ditë e më shumë turistë nga vende të ndryshme të botës.

 Por edhe atyre iu duhet të mundohen për të mbërritur deri këtu. Nuk ka rrugë të rregulluara. Për të arritur në Kalanë e Skënderbeut duhet të kalosh për 30 minuta në këmbë përmes një xhungle të vërtetë.

Sipas të dhënave historike në këtë kala ushtria e Skënderbeut priste sulmet e venedikasve qe vinin për te zbarkuar ne token Shqiptare.





Redaksia Online
(M.Ç/shqiptarja.com)