15 gennaio 2015

Përmeti, qyteti i trëndafilave dhe sazeve, destinacion turistik tërheqës per 2015

permetiTIRANE, 15 Janar/ATSH/- Qyteti i Përmetit, i mikpritjes, i luleve, i këngëve popullore lirike me saze, qyteti i verës, rakisë, glikove unikale, hapi dyert në fundjavën e shkuar për turoperatorët turistikë në vend për t’i njohur ata me bukuritë që ofron, historinë dhe traditën përmetare. “Permeti ofron gjithçka përveç detit”, është slogani i vendosur në një tabelë në hyrje të qytetit. Përmeti dallohet për parqet e lulëzuara, ku në çdo stinë janë të pranishme lulet e llojeve të ndryshme e veçanërisht trëndafilat, të clët i kanë dhënë emrin, “Qyteti i luleve dhe trëndafilave”. Për të gjiha këto veçanti që e karakterizojnë mund të quhet pa frikë “Perla e Jugut”. Por, Kryetari i Bashkisë së Përmetit, Gilbert Jace, thotë se mikpritjen e kemi çelësin e suksesit. “Çka vendi ynë është sot nuk është ai që do të jetë pas disa viteve, pasi po punohet shumë fort për të promovuar qytetin tonë. Kemi pothuajse infrastrukturën e nevojshme për të ofruar paketa të ndryshme. Vizitorëve që do të vijnë do tu ofrohet gjithçka në mënyrë cilësore. Planet janë të gatshme dhe brenda një periudhe të shkurtër kohore, 1-2 vjet do të ketë një rrjet shërbimesh që do t’u ofrohet vizitorëve, pasi disa nga pasuritë natyrore të qytetit si, Bredhi i Otovës, banjat e Bënjes, janë në gjendje natyrale pa afruar asnjë akses shërbimi”, deklaroi kryetari i Bashkisë.
Vasillaq Nikolla
Vasillaq Nikolla
Kryetari i UOTSH, Sadik Malaj
Kryetari i UOTSH, Sadik Malaj
Përmeti ka zyrën e informacionit turistik që ofron informacion për të gjithë turistët vendas dhe të huaj. “E shfrytëzojnë qytetin e Përmetit për bukuritë natyrore, veçanërisht për ato që shtrihen përgjatë Vjosës”, thotë Vasillaq Nikolla, një nga sipërmarrësit në këtë qytet. Duke folur për promocionin teksa tregon zyrat e Informimit, Nikolla shprehet se “duke qënë modest mund të them me plot bindje se kemi ecur më shumë se qytetet e tjera në këtë fushe”. Falë edhe këtij promovimi dhe informacionit të ofruar, sipas Nikollës, ka patur rritje të numrit të turistëve. “Katër muajt e sezonit veror në Përmet nuk gjen vend, pasi janë të gjitha vendet në hotel të rezervuara. Vitin e kaluar kemi qënë plot. Ka patur një numër të lartë turistësh të huaj. Janë gati 200 shtretër. Edhe këtë vit pothuaj të gjitha rezervimet janë mbyllur”. “Deri tani kemi 1100 rezervime për sezonin veror turistik. Këta janë persona qe janë paraqitur pranë zyrës sonë të informimit, duke mos llogaritur këtu personat që vizitojnë Përmetin, por nuk paraqiten pranë zyrës sonë”, thekson Nikolla.
Ndërsa një ndër përfaqësuesit e operatorëve turistike të pranishëm në eksplorimin e resurseve permetare, Rexhep Kasmi, shprehet se 90 % të turistëve i sjell në Përmet. “Të huajt mbeten të kënaqur dhe një ndër ndalesat e tyre është gjthmonë Përmeti”, thekson Kasmi.
Duke vijuar vizitën në zyrën e informimit në qendër të qytetit të Përmetit, Kryetari i Operatorëve Turistikë Shqiptarë, Sadik Malaj, na thotë se “këtu të huajt që vijnë për të viztuar Përmetin marrin të gjithë informacionin e nevojshëm. Përmeti në aspektin turistik thotë shumë.  Ai është një destinacion me interesa të shumëfishta”, shprehet Malaj, ndërsa vë theksin në faktin se numri i turistëve që kanë vizituar vendin tonë është rritur me 20 % në vitin 2014 krahasuar me një vit më parë. Çdo agjenci që merret me turistët që vizitojnë Shqipërinë, duhet ta shohë Përmetin me interes, shprehet Malaj. “Grupet turistike shqiptare përveç tregut rajonal po kthejnë sytë gjithnjë e më shumë drejt pikave turistike shqiptare. Dhe ne duhet t’i ekspozojmë dhe të mundohemi t’i komercializojmë këto destinacione turistike shqiptare. Mund të bëjmë paketa turistike edhe për shqiptarët nga Shkodra apo Tirana me paketa turistike tre ditë e dy net në Përmet. Përveç Valbones, Thethit apo zones juglindore të Shqipërisë, është e rëndësishme të përdorim edhe qytete të tjera të vendit për interesat e këtij karakteri të ekskursioneve që mund të bëjmë me shqiptarët”, thotë Malaj.
pamje nga qyteti i PermetitE njohur që në antikitet me emrin “Trifilia”, një pjesë e “Rajonit Melotid”, emri i Përmetit e ka prejardhjen nga një hero i quajtur Premt, nga i cili historia ka arritur deri tek ne, gjeneratë mbas gjenerate. Thuhet që ky hero për mos të rënë në duar të armikut, vendosi të hidhej nga “Guri i Qytetit”, një gur i madh që ndodhet afër qendrës së qytetit.
Rrethi i Përmetit me rreth 39.000 banorë është i pozicionuar në juglindje të Shqipërisë, me një siperfaqe prej 929 km². Qyteti i Përmetit përshkohet nga lumi Vjosa nga i cili merr emrin dhe lugina. Lumi Vjosa përshkon 58 km të rrethit dhe renditet i dyti në Shqipëri për rezervat hidrike që përmban; krijon një luginë shumë të bukur e cila ka kontribuar në Shqipëri duke filluar nga Çarshova dhe duke mbaruar në rrethin e Tepelenës. Malet më të rëndësishme janë: Nëmërçka 2485 metra, Dhëmbeli 2080 metra dhe Trebeshina 1922 metra.
Rrethi ndërtohet nga tre njësi fiziko – gjeografike, zinxhiri malor Qarisht – Dangëlli – Postenan; Lugina e lumit Vjosa dhe zinxhiri malor Trebeshinë – Dhëmbel – Nemërckë. Në antikitet lugina e Përmetit banohej nga fisi Iliria e Parauejve. Shumë emra te kulturës, artit dhe shkencës shqiptare e kanë origjinën nga kjo tokë. Ndër këta mund të përmenden vëllezërit Frashëri, skulptorët Paskali e Paço, këngëtarët Xhemali e Koço, shkencëtari Nikolla Çasko, historianët Pollo e Frashëri, linguisti Kostallari, shkrimtarët Bulka e Malëshova si dhe klarinetisti Laver Bariu, fitues i shumë çmimeve nacionale dhe internacionale. Rrethi i Përmetit shtrihet ne gjirin e luginës dhe rrethohet nga male me një florë dhe faunë të veçantë të zonës.
Pamje e lugines nga Bredhi i HotovesNuk mungojnë parqet me një interes të madh natyror si, Bredhi i Hotovës dhe burime termale me ujë sulfurik në luginën e Langaricës, të cilat formojnë pishina natyrale dhe të përdorshme. Gjithashtu, janë të shumta monumentet me ineteres të madh historik, ndër të cilat numërohen shumë kisha, manastire të periudhës bizantine, rrënoja arkeologjike të mbetura nga pushtimi turk (kështjella, ura etj). Itenerareve religjioze kristiane, ju bashkangjiten dhe ato myslimane dhe në veçanti lëvizjet Bektashiane që gjenden në fshatrat Frashër e Ali Postivan, zonat më të zhvilluara dhe të pelegrinazhit. Edhe muzika popullore e folkloriste meriton të citohet, pasi është e njohur në të gjithë Shqipërinë. Një tjetër aspekt që e bën të famshme këtë luginë janë dhe produktet tipike agro – ushqimore. Produktet agro – ushqimore tipike dhe me një kualitet të lartë të zonës janë rrushi, në veçanti lloji i veçantë dhe autokton, Debinë e bardhë si dhe Merlot i zi, vishnje, kajsi, fiq, bimë aromatike dhe medicinale. Produkte të cilat kanë një kualitet të admirueshëm janë dhe produktet e mishit; mishi i qengjit, mishi i dhisë etj.
Vera dhe rakia e Përmetit gjithmone janë klasifikuar në më të mirat e Shqipërisë. Me famë janë dhe djathrat, mishi, rigoni, mjalti dhe glikotë ( ëmbëlsirë karakteristike me bazë frutash të freskëta). Gjatë vitit, në Përmet zhvillohen aktivitete të ndryshme si “Festivali Internacional Multikulturor, “Festa e verës”, gara me rafting, kanotazh dhe rally.Duke folur për arkitekturën popullore nuk mund të rrimë pa përmendur disa elemente karakteristike të këtij vendi. Bëhet fjalë për shtrirjen e disa rrugëve, të realizuar në gure gëlqerorë dhe gurë lumi. Në cdo shtrirje rrugore ekzistonte një linjë qëndrore për kalimin e ujit, që pothuajse cdo ditë, hapej nga mullijntë për të garantuar pastrimin e rrugëve, portave dhe kopshteve. Ndërtimet e shekullit te XIX nuk i kalonin dy katet dhe kishin një sallë të madhe për festa dhe martesa. Disa nga këto banime janë të pranishme në fshatrat si Novoselë, Shqeri, Cerje dhe Dangëlli.
Ujrat termale te BenjesNjë nga resurset natyrore me siguri nga më të çmueshmet, janë burimet termale të Bënjës, fshat i ndodhur rreth 8 km nga Përmeti. Korniza e këtij vëndi të bukur është Ura Otomane e Katiut mbi përroin e Langaricës, i cili para se të derdhet ne lumin Vjosa, ndërton me kilometra një Kanion të vizitueshëm gjatë sezonit veror. Burimet e ujërave termale janë natyrore jo të mbledhura dhe kanalizuara, por në 6 vaska të vogla që formojnë liqene natyrale me një bukuri të vyer. Çdo vaskë, me temperatura që variojnë nga 25°C – 28°C, është e përdorshme për trajtimin e një problemi specifik në bazë të cilësive kurative të burimit që rrjedh: reaumatizëm, sëmundje dermatologjike, akne, ostoporozë, gastrit etj. Në një nga vaskat është e mundur të mbledhësh edhe argjil apo baltë adapte për trajtimet e lëkurës. Në këtë vend mund të gjesh vizitorë nga e gjithë Shqipëria si dhe të huaj të cilët qëndrojnë për pak orë apo për pak ditë. Duke vazhduar më tej urës së Katiut dhe vaskave termale ke mundësinë te hysh në brendësi të Kanionit formuar nga perroi i Langarices duke arritur deri ne fund ku ndodhet Ura e Dashit (nje vend i befasueshëm me mure shkëmbor prej 30 metrash dhe gjatësi maksimale prej 15 metrash); thuhet që në shpellat e këtij vëndi jetonin murgjit asketik. Gjithashtu mund të vizitohet “Shpella e Pëllumbit”, vendbanim parahistorik. /a.gjonaj//a.ke/http://www.ata.gov.al/permeti-qyteti-i-trendafilave-dhe-sazeve-destinacion-turistik-terheqes-212160.html

Nessun commento:

Posta un commento

Search

Translate