TIRANË, 7 Maj / ATSH-N.Lena/ – Selca ndodhet 8 km në veri të qendrës së komunës Kelmend. Është quajtur fshati i bukurive të fshehura, sepse ndodhet tepër në veri dhe mundësitë e vizitave atje kanë qenë të vështira. Përgjatë rrugës së makinës ai duket si një fshat i varfër, por nuk është kështu, ai fsheh bukuri të shumta jo vetëm natyrore, por dhe kulturore, etnografike, të mirësjelljes dhe mikpritjes. Në Selcë gjendet kanioni më i madh i Kelmendit, ujvara më e bukur, shumë shpella për t’u eksploruar, shtigje malore interesante, peisazhe shumë të bukura për t’u fotografuar, vende historike, shtëpi me arkitekturë të veçantë, punime artizanale të veçanta të lëkurës, drurit, gurit etj.Thuhet se emri i këtij fshati ёshtё trashёguar nga njё paraardhёs i banorёve qё quhej Seli, por kjo rrëfenjë shkon në kufijt e legjendës.
Drejtimi kryesor i ekonomisë ёshtё blegtoria. Mes fshatit kalon lumi Cem i Selcёs. Në këtë lum, gjatë muajve prill – maj, mund të zhvillohet rafting për aventurierë të sporteve të ujit. Gjatë rrugës së tij ky lum çan malet duke formuar kanionin e Gerrles (900 m i gjatë dhe 25 m i thellë), i cili shfaqet mes shtëpive, arave dhe vende- vende ngushtohet shumë. Ujvara e Slimës dhe sidomos Ujvara e Sllapit, janë kryevepra të natyrës, ku çdo vit në stinën e verës tërheqin vizitorë e turistë të shumtë.
Nga veprimtaria karstike janё formuar shumё shpella si, Shpella e Pogonicёs, Shpella e Gradёs, Shpella e Rrugёs, Shpella e Vllojakut, Shpella e Pajës, Shpella e Turçinit, etj. Në Selcë, në lagjen Pepaj, si rezultat i veprimtarisë erozive në disa shkëmbinj janё “gdhendur” lloj – lloj formash të veçanta. Këta shkëmbinj njihen me emrin “Karramanet”. Gjithashtu, shumё interesante janё ulluqet shkёmbore, Gërdhata e Vilёs dhe Jeshnicёs, burimet e ujit “Gurra e Zanёs”, me një legjendë që I shkon pas dhe vendasit ta rrëfejnë me interes e dashuri, ujёt e Kritё etj. Pasuri tjetёr natyrore ёshtё Bjeshka e Jeshnicёs, e cila pёrbёn njё nga qendrat mё tё mёdha blegtorale tё Alpeve Perёndimore. Në Selcë gjenden monumente të veçanta natyrore, si lëndina e Greçës, e mbuluar me lule shumëngjyrëshe dhe bimë mjekësore si, salepi, teukel, çaji i malit, etj. Në mes të kësaj lëndine është një tjetër monument natyre, ahu i Greçës.
Ky ah, gjithashtu është një vend i rëndësishëm historik për Shqipërinë, pasi këtu më 1911 u mbajt Kuvendi i Përgjithshëm i krerëve shqiptarë, të cilët nënshkruan memorandumin me 12 pika drejtuar Portёs sё Lartё. Vende
tё tjera historike janё Qafa e Këstecit dhe Suka e Mkushit, ku u zhvillua beteja kundёr turqve. Malësorët janë shquar për burra trima dhe të fortë. Forcën e tyre e dëshmon më së miri një rrasë guri, e cila peshon rreth 400 kg. Ajo njihet si Rrasa e Shtjefnit dhe ka marrë emrin e burrit, i cili e ngriti atë deri në bel. Shtёpitё këtu janё 1-2 katёshe prej guri, me çati tё mbuluara me tjegulla tё kuqe. Karakteristikё e tyre, ndryshe nga fshatrat e tjerë, ёshtё ballkoni i gjatë, që shtrihet gjatë gjithë pjesës së përparme të shtëpisë. Ky fshat ka lindur dhe rritur artistë të penës dhe të daltës. Mjeshtrat më të mirë të punimit të lëkurës, gdhendjes sё drurit dhe gurit gjenden këtu. Punimet e tyre frymёzohen nga bukuria femёrore, natyrore, gjithashtu kanё motive historike e fetare. Një suvenir i tillë do të ishte një kujtim i bukur nga Kelmendi. Festa e fshatit është Zoja Rruzare, e cila festohet në datë 7 tetor. Në këtë datë Kelmendi “pushtohet” nga vizitorë të shumtë edhe përtej oqeanit. Janë vendalinj që vijnë e kujtojnë vendlindjen e të parëve. Mbas festës, të gjithë mblidhen në oborrin e kishës dhe kryejne ritet fetare. Kjo kishë ka një histori të veçantë që vendasit e besojnë dhe e respektojnë. Por edhe sot në të, mjeshtrat artistë të gdhendjes, kanë lënë gjurmën e daltës së skulptorit në trupin e një peme të rritur në oborrin e kësaj kishe.
Në trungun e pemës së gjallë, pra që lulëzon, është i gdhendur trupi i Jezu Krishtit.
Në këtë fshat do të gjeni Bar-Kafe të vogla si dhe një rezervat trofte. Ndërsa për ata që duan të kalojnë aty një natë apo disa, ka bujtina të vogla të ngritura nga vendasit apo duke përdorur dhe shtëpitë e tyre. Rruga automobilistike për të arritur në Selcë nis nga Shkodra dhe është e asfaltuar. Mund të udhëtohet qetë dhe mirë.
Sezoni turistik ka nisur dhe për Selcën e largët… /a.ke/
Nessun commento:
Posta un commento