30 agosto 2016

Prezantohet projekti i rrugës që lidh bregdetin me zonën malore të Kurveleshit

gusmarTIRANË, 30 Gusht / ATSH / – Agjencia Kombëtare e Bregdetit nëpërmjet drejtorit të saj,  Auron Tare dhe në prezencë të  Kryetarit të  Bashkisë së Tepelenës, Tërmet Peçi, prezantoi  për banorët e zonës  në Gusmar të Tepelenës, modelin e rrugës që do të lidhë zonën bregdetare me atë malore.
Ky projekt është  hartuar nga  Agjencia Kombëtare e Bregdetit në bashkëpunim me specialistët e fushës së ndërtimit të rrugëve, për të krijuar kështu një  infrastrukturë  turistike midis vijës bregdetare dhe zonave malore të krahinës së Kurveleshit .
“Hapja drejt detit e këtyre zonave të mrekullueshme  malore, për zhvillimin e turizmit rural do të krijonte një produkt turistik multifunksional dhe multi interesant për të gjithë ata që kërkojnë jo vetëm detin, por edhe natyrën malore dhe anasjelltas”, shprehet  Auron Tare.gusmar1
Zhvillimi i turizmit do ti nxjerrë këto zona nga harresa dhe izolimi ekonomik, do të japë mundësinë e një impakti në fushën ekonomike direkt në familjet e banorëve të zonës, në transportimin e produkteve të tyre ble’gtorale apo bujqësore drejt qëndrave të zhvilluara siç janë Vlora, Orikumi, Himara  apo dhe drejt  Fierit apo Tiranës.
Kjo rrugë do të zhvillojë përdorimin e aseteve natyrore por edhe do të zhvillojë agroturizmin, si  një potencial ende i pazhfrytëzuar në këtë zonë të thellë./m.m/
https://www.ata.gov.al/prezantohet-projekti-i-rruges-qe-lidh-bregdetin-me-zonen-malore-te-kurveleshit/

Dardhë – Muzeu historik si nxitje e turizmit kulturor per te shtuar interesin

dardhaTIRANË, 30 Gusht / ATSH/ – Në Dardhën e Korçës nuk shkohet vetëm për turizmin natyror apo atë sportiv, atje shkohet edhe për turizmin kulturor.
Studiuesi dhe restauratori Frederik Stamati sjell përshtypjet e tij nga muzeu historik i Dardhës.
Ky muze është ngritur nga vetë dardharët dhe ka një autor kryesor, ai është Kristaq Balli.
Nuk ka shumë kohë që u organizua Muzeu i Dardhës, ai u ngrit në  shkollën që ndërtuan dikur me shpenzimet e tyre emigrantët ekonomikë të këtij fshati që migruan në  Amerikë.
Në pamje të parë të bien në sy elementet ndërtimore origjinalë, të ruajtur gjatë një shekulli të ekzistencës së kësaj shkolle.  Por, ky  muze të impresionon menjëherë me atë që paraqet, një shoqëri shqiptare tepër të përparuar.dardha1
Aty ndesh figura të njohura të shkencës tonë, arsimit, lëvizjes për pavarësi, të të gjitha fushave të kulturës, etj.
“Gjatë vizitës në muze  ndjen vetëm lartësinë e komunitetit dardhar”, shprehet Stamati.
Kush viziton Dardhën duhet të vizitoj edhe muzeun e saj./m.m
https://www.ata.gov.al/dardhe-muzeu-historik-si-nxitje-e-turizmit-kulturor/

Guida franceze, 10 ditë për të njohur Shqipërinë

IMG_5434-Le_gourmand_voyageur_roadtrip-albanie-300x211TIRANË, 30 Gusht/ATSH/- Janë francezët ata që së fundmi kanë vendosur në qendër të vëmendjes turizmin në Shqipëri. Këtë herë është blogu i njohur francez i udhëtimeve ‘Gourmand’ që ka njoftuar një udhëtim 10-ditor në Shqipëri. Ata kanë vendosur të ndajnë me lexuesit çdo detaj të udhëtimit.
Arsyeja se përse zgjodhën Shqipërinë ka të bëjë me autenticitetin e vendit tonë. “Shqipëria është plot me peizazhe befasuese, parqe natyrorë dhe tempuj të lashtë.
Ne mbetëm disi të zhgënjyer me Kroacinë dhe Malin e Zi që nuk e kanë ruajtur origjinalitetin e tyre dhe i kanë hapur rrugë turizmit masiv. Në Shqipëri, ne shpresojmë të gjejmë brigje të paprekura. Ne do të nisemi me një linjë direkte të krijuar së fundmi nga Parisi për në Tiranë”, shkruhet në Gourmand.
Ja çfarë parashikon udhëtimi:
Dita 1: Mbërritja në Aeroportin e Tiranës. Nisja direkt për në pikën tonë të parë të interesit: Parku Kombëtar i Thethit në Veri, me një ndalesë në Shkodër.
Dita 2: Udhëtim në Theth, qëndrim për 2 net, në një nga shtëpitë mikpritëse.
Dita 3: Ecje në Theth, drejt peizazheve që premtojnë se të lënë pa frymë.
Dita 4: Nisja për në Durrës
Dita 5: Vizitë në Vlorë dhe në rrethinat e saj, ku do të zbulojmë Llogoranë, Parkun e Zvërnecit dhe Orikumin
Dita 6: Dhërmi. Ne shpenzojmë kohë në plazhin e Dhërmiut dhe të Llamanit.
Day 7: Në Jug do të qëndrojmë 3 ditë. Në të përfshihet qëndrimi edhe në Sarandë
Dita 8: Plazh në Ksamil dhe ekskursion në ishullin e Korfuzit
Dita 9: Vizitë në Gjirokastër
Dita 10: Rifillojmë rrugën për në kryeqytet, për të shpenzuar pak kohë në të, për t’u nisur në ditën e 11-të për në Paris.
“Ne kemi rregulluar ushqimin dhe akomodimin. Për këtë të fundit shpresojmë të shpenzojmë rreth 200 euro për person. Mezi presim që të shkojmë”, thuhet në blogun francez. /monitor.al/a.gjonaj//m.m/
https://www.ata.gov.al/guida-franceze-10-dite-per-te-njohur-shqiperine/

29 agosto 2016

Shtegu panoramik i eremitëve mesjetarë, bërthama turistike e Beratit

berat 1TIRANË, 26 Gusht/ATSH/.- Agjencia Kombëtare e Turizmit ka treguar dhe një herë se është e pranishme me pjesëmarrje aktive në mbështetje të realizimit të projekteve për promovimin e turizmit.
Bashkëpunimi me Bashkinë Berat për konsolidimin e konceptit të turizmit të qëndrueshëm vjen këtë herë përmes projektit të shtegu panoramik të eremiteve mesjetarë. Agjencia Kombëtare e Turizmit vlerëson se ky shteg, kjo rrugë, në itinerar dhe në pamje madhështore është bërthama turistike e Beratit, që lidh shkurt e magjishëm qytetin e jashtëm me Kalanë ose dy pjesët më përfaqësuese historike dhe turistike dhe ka një rëndësi të madhe në të gjitha këndvështrimet.
Me ndërtimin dhe kompletimin e saj Beratit i shtohet jo vetëm një pasuri që zbulon mbi 2000 e ca vjet histori, por edhe një qasje të re e moderne për turizmin, që duhet shfrytëzuar më së miri sepse nuk mund t’i mungojë hartës europiane të turizmit shqiptar.
Projekti, një risi që na shpalos mbi dymijë e ca vjet qytetërim
Rruga e projektit tonë që rinis aty, vazhdon i ngjitet shpatit të thiktë deri në lartësinë e Kishës së Shën Mëhillit, xhevahirit të monumenteve të kulturës së Shqipërisë. Kisha e Shën Mëhillit është ndërtuar në këtë shpat të thepisur, në anën jugore të Kalasë së Beratit. Ajo është një kapelë e tipit kryq i brendashkruar pa mbështetje të brëndshme, me kupolë mbi tambur dhe me narteks në anën perëndimore.
berBerati si një qëndër kryesore i turizmit shqiptar, i quajtur nga gazetarët e udhëtimeve si Diamanti i Ballkanit, meriton një rizgjim befasues. Ky rizgjim befasues nuk është gjë tjetër, por rihapja dhe rigjallërimi modern i shtegut të vjetër të Oshënarëve apo Eremitëve të Mesjetës së hershme duke rizbuluar dhe vënë në shërbim publik e turistik mbi dymijë e ca vjet histori. Ajo fillon nga rruga kryesore tek Ura e Goricës, pikërisht në vendin ku ndodhej Katedralja e vjetër, Shën Maria e Ujërave, në lagjen më spektakolare të qytetit, Mangalem, e cila ka qënë e madhe, me dy kate dhe kambaneri, dhe e djegur dy herë. Kronikat e vjetra thonë se besimtarët e Beratit në këtë kishë varrosën trupin e martirit Shën Nikodhim më 1709.
Agjencia Kombëtare e Turizmit jo vetëm e shikon me përparësi këtë nismë, por do të fokusohet me përkushtim deri në realizimin e plotë të saj. Projekti i ringjalljes së kësaj rruge mijëravjeçare është një risi e domosdoshme për Beratin sot; është si një shkundje nga apatia, nga mosbesimi, nga kaosi që na rrethon. Bëhet fjalë për një shteg, rrugë të kalldrëmtë, rreth dy metra e gjerë, me shesh-pushime panoramike, me parmakë të hijshëm mbrojtës, me ndriçim të përshtatshëm, me sinjalizime shpjeguese dhe informacione të detajuara historike, të alternuar me shërbime të ndryshme turistike e shplodhëse.
beratDuke rindërtuar shtegun turistik, do të mund të bëhet e mundur vizita e disa prej 18 guvave 2000 vjeçare, të cilat të befasojnë me brendinë e tyre ku veç elementeve të tjera të banimit shfaqin interes edhe për mbishkrime të hershme apo enigma të tjera ende për t’u zbuluar.
Kjo nismë e AKT, u bë në vijim të ditëve të pelegrinazhit në Malin e Tomorrit, i cili tashmë është kthyer në një produkt jo vetëm shpirtëror por edhe turistik pasi me qindra mijëra vizitorë të shumtë nga brenda dhe jashtë vendit vizitojnë këtë vend të shenjtë dhe në të njëjtën kohë vizitojnë dhe zonat turistike të qytetit dhe krahinës përreth.
Promovimi në rritje që AKT ka bërë për Beratin, ka dhënë frytet e para pasi nga të dhënat paraprake që kemi marrë nga Bashkia dhe operatorët turistik, kemi një rritje me 30% të numrit të vizitorëve që vijnë në Berat, krahasuar me vitin e kaluar./m.m/
https://www.ata.gov.al/shtegu-panoramik-i-eremiteve-mesjetare-berthama-turistike-e-beratit/

Çesma e Gjizaxhiut dhe historia e fshatit turistik Stëblevë

  • steblev.jpg
  • steblev1-1.jpg
  • steblev2.jpg
  • steblev4.jpg
  • steblev6.jpg
  • steblev7.jpg
  • steblev8.jpg
  • stebleve.jpg
  • stebleve3.jpg
  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
steblevTIRANË, 27 Gusht / ATSH- N.Lena/ – Parku Kombëtar Shebenik-Jabllanicë tashmë është kthyer në një atraksion të mirfilltë turistik. Brenda këtij parku gjendet dhe një prej fshatrave që vizitohet më shpesh për vet shtrirjen e tij gjeografike, për historinë, bëmat dhe kulturën e trashëguar.
Stebleva shtrihet midis zonës së Dibrës dhe asaj të Librazhdit. Ajo është perlë e vërtete për bukuritë e rralla natyrore. Është shumë e përshtatshme për turizëm, pasi verës ka lulëzim të plotë, ndërsa dimrit mbulohet me borë, pra është e përshtatshme për turizmin e bardhe dhe sportin e skive. Shumë steblevas, tashme biznesmene, kanë ndërtuar shtëpi ku qëndrojnë për pushime.
Qëndrat e turizmit klimaterik malor ngrihen në vende ku kushtet klimaterike janë më të mira se ato të vendbanimit të përhershëm. Klima është motivi kryesor tërheqës, që i shndërron këto vende në destinacione turistike. Kjo zonë stebleve3karakterizohet nga një klimë me ajër të pastër dhe të shëndetshëm që shkarkohet nga lartësia mbi nivelin e detit mbi 1000 metra, nga prania e pyjeve, nga ujerat e ftohtë si dhe nga fakti që kjo zonë është tërësisht me orientim bujqësor dhe blegtoral, faktorë këta që i motivojnë turistët potencialë në përzgjedhjen e destinacionit turistik në kërkim të kushteve më të mira.
Të ardhur në këto zona për turizëm klimaterik janë ish-banorët e kësaj zone dhe së fundmi edhe të huaj që kane marrë informacion për veçantitë e zonës dhe të shtyrë nga kurioziteti për këto vise të bukura dhe për të kaluar disa ditë në ajrin e pastër dhe klimën e mrekullueshme. Këta vizitorë mund të sistemohen në shtëpitë e fshatarëve si miq, por edhe ne qëndra hotelerike që kanë filluar të ndërtohen. Tani së fundi disa biznesmenë dhe investitorë vendas kanë ndërtuar edhe shtëpi të vogla turistike. Prej shumë vitesh po zhvillohet një lloj turizmi që lidhet me mjedisin rural. Pritja e turistëve këtu mund të bëhet në hotele, pensione, kampingje, apartamente të lëna me qera, në shtypi të dyta të fshatarëve etj.
steblev4Agroturizmi është një tjetër mundësi ekonomike për zonën dhe përfaqëson atë lloj turizmi që është i lidhur me fshatin, ku krahas veprimtarive argëtuese turistike, zhvillohen edhe veprimtari të tjera karakteristike të zonës si, korrje, vjelja e frutave, përgatitja e ushqimeve, ëmbëlsira të veçanta, punime artizanale etj.
Pushimi nëpërmjet agoturizmit nuk përfshin vetëm momentin e pushimit apo një argëtim të thjeshtë, por paraqet mundësi për t’ju përkushtuar veprimtarive që synojnë të pasurojnë personalitetin e turistit. Pra, bëhet fjalë që të praktikohen pushime inteligjente, të stimuluara në mënyrë të kulturuar ku koha kalohet sipas dëshirave të vizitorit. Format e agroturizmit janë të shumta. Ato ndryshojnë sipas vendeve dhe brenda vendit, sipas rajoneve për nga karakteristikat e pritjes, shërbimeve te afruara, mjedisi, kushtet natyrore etj. Agroturizmi ose turizmi rural, është motivi më tërheqës. Ekoturizmi është destinacioni final I kësaj zone. Ai fillon me një shëtitje të zakonshme përmes një pylli të qetë deri në eksplorimin dhe studimin e karakteristikave natyrore origjinale të viseve të largëta. Parqet natyrore, rezervatet e gjuetisë, peisazhet e mbrojtura etj, janë rajone ekoturistike që tërheqin vëmendjen e për vlerat rekreative, edukuese dhe steblev8estetike të tyre.
Shërbimet bazë për zhvillimin ekoturizmit, për t’a bërë atë një faktor të rëndësishëm ekonomik në rajon, janë sigurimi i transportit dhe infrastruktura, ndërkohë që për kushtet e sistemimit dhe të ushqimit kërkesat mund të jenë shumë modeste.
Ndërtimet në këto qendra turistike janë të kontrolluara dhe në harmoni të plotë me mjedisin për rreth. Qendrat turistike të ekoturizmit janë mjedise të mbrojtura, të cilat janë të vendosura në relieve dhe kushte klimaterike të ndryshme. Këtu mund të shfrytëzohet edhe turizmi i gojëdhënës apo mitit, i kuriozitetit dhe ngjarjeve e historive të ndodhura.
Në një bisedë me Fatmir Brazhdën për doket, zakonet dhe gojëdhënat e zonës, më rrëfeu për çesmën e Gjizaxhiut, ku shkojnë e vizitojnë shumë kurioze ngjarjesh e historishë. Pse ka këtë emër? E pyeta Fatmirin. Kohë më parë  më tha,  një tregëtar grumbullonte gjizë në fshatrat e Steblevës dhe e transportonte atë me kuaj dhe e dërgonte në qytetet si Elbasani apo edhe në Strugë. Banorët e këtyre zonave e quajtën Gjizaxhiu dhe kështu e thërrisnin kur kishin për të shitur gjizën apo dhe djathin e tyre.
steblev1Këtë punë ai e vazhdonte vite me radhë, mirëpo ngaqë po bënte këtë lloj tregtie, normal që mbante shumë para me vete.
Kjo gjë u nuhat nga disa hajdutë apo kusare, të cilët i dolën në pritë afër kësaj çesme në drejtim të fshatit Steblevë. Gjatë përpjekjes me ata për të mos ju dhënë paratë hajdutëve, ata e vranë Gjizaxhiun.
Kështu që aty ku ai u vra fshati i bëri dhe varrin Gjizaxhiut të mirë dhe që edhe sot quhet Varri i Gjizaxhiut e po ashtu mori emër dhe kjo Çesëm. Nuk dihet emri apo origjina e Gjizaxhiut të mirë, por edhe sot njerezit vijnë e bëhen kurioze për jetën dhe historinë e tij. Vijnë, pine nga një grusht uje në çesmën me emrin e tij dhe ikin në punën e tyre. Stebleva ka dhe histori të tjera të bukura, përfundon Fatmiri. Ndërsa turistët bëhen kurioze për këto histori dhe ngjiten drejt Steblevës. /a.ke
https://www.ata.gov.al/cesma-e-gjizaxhiut-dhe-historia-e-fshatit-turistik-stebleve/

26 agosto 2016

Mozaiku i termës romake dhe i Baptiserit në Butrint, të hapur deri në 1 shtator 2016

butrint1TIRANË, 23 Gusht/ATSH/.- Mozaiku i dyshemesë së dhomës së veshjes të termës romake pranë Teatrit dhe gjysma e mozaikut të Baptisterit të Butrintit do të qëndrojnë hapur për vizitorët deri në 1 shtator 2016.
Gjatë viteve të fundit, ky mozaik është lënë i ekspozuar në muajt korrik dhe gusht dhe më pas mbulohet për t’u mbrojtur nga uji. Hapja e mozaikëve nuk është e rëndësishme vetëm për t’i ekspozuar për vizitorët, por mbi të gjitha për të parë nivelin e ruajtjes së tyre dhe për të realizuar mirëmbajtjen.
Sipas një njoftimi për shtyp të Ministrisë së Kulturës, gjatë muajit korrik Parku Kombëtar i Butrintit ka pasur një fluks vizitorësh vendas e të huaj, duke e çuar në 28 mijë numrin e tyre.
Baptisteri u ndërtua në çerekun e dytë të shek. 6 pas er. së re dhe mund të ketë qenë punë e artizanëve lokale, të cilët janë bazuar te Nikopoli aty pranë. Ai u zbulua më 1928 nga Misioni Arkeologjik italian. Është baptisteri i dytë më i madh në Perandorinë Romake, kurse më i madhi ndodhet në Aja Sofia, Stamboll. Të gjitha aspektet e arkitekturës dhe të dekorimit (si dyshemeja me mozaik) e baptisterit është simbolikë e ritit të pagëzimit, me burimin në anën e tij të largët që përfaqëson burimin e jetës së përjetshme.
Mozaiku i jashtëzakonshëm shumëngjyrësh i dyshemesë së Baptisterit të Butrintit, është një nga mozaikët më të kompletuar dhe më kompleks të të gjithë baptisterëve të asaj periudhe. Dizajni i përgjithshëm i dyshemesë konsiston në shtatë unaza, të cilat rrethojnë vendin e pagëzimit që ndodhet në qendër, duke e rritur numrin në tetë – numri kristian për shpëtim dhe përjetësi.
Vëmendja e vizitorëve që kalojnë pragun e hyrjes kryesore, tërhiqet nga dy pallonj në një hardhi që rritet në një vazo të madhe. Pallonjtë simbolizojnë parajsën dhe pavdekshmërinë; vazoja dhe rrushi, Eukarsinë dhe gjakun e Krishtit. Në periudhën mesjetare ndërtesa u modifikua me diga guri dhe një apsidë gjysëm-rrethore; një dysheme me pllaka guri u vendos mbi mozaik. Në vende të tjera në qytet deri më tani janë gjetur tetë kisha, më domethënësja është e vendosur në fushë përballë kanalit të Vivarit./k.s//m.m/
https://www.ata.gov.al/mozaiku-i-termes-romake-dhe-i-baptiserit-ne-butrint-te-hapur-deri-ne-1-shtator/

Sezoni turistik 2016 – Shtim i numrit të vizitorëve në Gjirokastër

gjirokastra-castle1TIRANË, 24 Gusht/ATSH/.- Qyteti i gurtë i Gjirokastrës ka patur një fluks në rritje të vizitorëve vendas dhe të huaj gjatë periudhës janar- korrik 2016.
Sipas një njoftimi për shtyp të Ministrisë së Kulturës, gjatë kësaj periudhe qyteti dhe kalaja e Gjirokastrës u vizitua nga 26 504 turistë vendas dhe të huaj.
Promovimi në rritje i trashëgimisë kulturore, i shoqëruar me aktivitete kulturore kanë shtuar edhe interesin për këtë qytet.
Gjirokastra është e vendosur në faqen e Malit të Gjerë, në shpatet verilindore të tij dhe në krahun e majtë të luginës së lumit Drino. Qyteti është përfshirë në Listën e Trashëgimisë Botërore të UNESCO-s më 2005, si një nga pak shembujt e mbijetuar në Ballkan të qyteteve tregtare të stilit otoman.
Kalaja e Gjirokastrës si histori e lidhur me këtë qytet përmendet për herë të parë si qytet dhe kështjellë në vitin 1336. /k.s//m.m/
https://www.ata.gov.al/sezoni-turistik-shtim-i-numrit-te-vizitoreve-ne-gjirokaster/

Turistët e vëzhgimit dhe të natyrës preferojnë Parkun Kombëtar të Divjakës

  • div1-4.jpg
  • div2-3.jpg
  • div4-5.jpg
  • div5-4.jpg
  • div6-3.jpg
  • div7.jpg
  • div8.jpg
  • div9.jpg
  • div10.jpg
  • div11-1.jpg
  • divj3-1.jpg
  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
div11TIRANË, 25 Gusht /ATSH- N.Lena/ – Këto ditë vere, turistët e vëzhgimit të natyrës e të shpendëve të rrallë kanë vizituar Parkun Kombëtar të Divjakës.
Turizmi i vëzhgimit të shpendëve apo kafshëve të egra, tashmë po kthehet në një lëvizje të vërtetë turistike edhe për vendin tonë.
Shembulli më domethënës për këtë është Parku Kombëtar i Divjakës, ku çdo fundjavë apo dhe në ditë të zakonshme, me dhjetra vizitorë vendas e të huaj, vijnë të vëzhgojnë nga afër shpendët e shumtë që jetojnë e shumohen  në këtë park të mbrojtur më së miri.
Objektivi kryesor është Pelikani Kaçurrel, por jo vetëm ai, janë edhe shpendë të tjerë të shumtë deri tek mjelmat ose flamingot që gjallojnë në strugat e ëmbla, buajtë e zinj, si një specie që preku çastin e zhdukjes para disa viteve, por që falë kujdesit dhe përkushtimit  të blegtorëve vendas, mundi të shpëtonte si një  rracë  e rrallë e zonës.div1
Tashmë vizitorët nuk janë kurioze të shlodhen në bregdet apo të shëtisin në pyllin e veçantë me pisha të buta, të shijojnë peshkun apo ngjalat e shijshme të Kënetës së Karavastasë, por ata mund të vëzhgojnë edhe shpendë të ndryshëm në jetën e tyre të egër.
Zbatimi i moratoriumit  që ndalon gjuetinë, në këtë zonë ka sjellë një rigjallërim të faunës së egër.
Por, një vlerësim optimal duhet bërë edhe për Drejtorinë Pyjore të Lushnjes dhe drejtorin e saj, Ardian Koçi, që kanë punuar me përkushtim për ta kthyer Parkun edhe në një atraksion turistik.
Pelikanët kaçurrelë që popullojnë lagunën e Karavastasë po tërheqin më në fund  edhe vëmendjen e mediave botërore dhe të turistëve të natyrës së egër.
div7Pelikanët kanë qenë të rrezikuar në të gjithë botën përgjatë dekadave të fundit për shkak të perceptimit se ata konkurojnë me njerëzit për peshkim nëpër lagunat e pasura, një perceptim ky që hidhet poshtë nga shkenca biologjike, sipas te ciles, llojet e peshqve të pëlqyer nga pelikanët janë të ndryshëm nga ata që peshkohen nga njerëzit.
Këta shpend të mëdhenj, krijojnë një emocion të veçantë te shikuesi kur ngrihen në fluturim.
Me përmasa nga 160 deri në 190 centimetra dhe me hapje krahësh mbi tre metra, ky është një nga zogjtë më të mëdhenj në botë.
Pelikanët shqiptarë ishin pothuajse drejt zhdukjes në vitet 1990, por janë rigjallëruar si pasojë e përpjekjeve të vazhdueshme të konservacionistëve për të shpëtuar grupimin e vogël që numëronte vetëm disa dhjetëra të tillë.div5
Çdo fundjavë vizitorë të shumtë popullojnë parkun e Divjakës ku objekt bëhet vëzhgimi i shpendëve të shumtë e të veçantë që popullojnë këtë lagunë.
Mbase ka ardhur koha që Ministria e Turizmit të shohe edhe nga “turizmi i vëzhgimit”, si një aset tjetër në turizmin shqiptar dhe të investoje në ato parqe natyrore ku  ky turizëm ka premisë të zhvillohet.
Një vend me hapësira të mëdha natyrore dhe me një biodiversitet të veçantë, vendi ynë mund të bëhet mjaft tërheqës edhe për turizmin e vëzhgimit. /a.ke/ https://www.ata.gov.al/turistet-e-vezhgimit-dhe-te-natyres-preferojne-parkun-kombetar-te-divjakes/

Kalimi i shtegut Theth- Valbonë apo anasjelltas, një mrekulli turistike si ne Vere dhe ne Dimer.

  • theth-4.jpg
  • theth2-2.jpg
  • theth3-2.jpg
  • theth4.jpg
  • theth5.jpg
  • theth6.jpg
  • theth7-1.jpg
  • theth8.jpg
  • theth9.jpg
  • thethi1-2.jpg
  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
thethi1TIRANË, 26 Gusht / ATSH-N.Lena/  – Kemi folur shpesh për turizmin alpin, për bukuritë, vështirësitë dhe adrenalinën që gjeneron ai në organizmat e atyre që e kanë provuar.
Turizmi alpin tek ne përfaqësohet kryesisht me Thethin dhe Valbonën. Këto janë dy qëndra të rëndësishme ku vizitore nga vendi dhe bota shkojnë atje në të katër stinët e vitit.
Të dyja pikat turistike Valbona dhe Thethi, janë afër njëra tjetrës dhe ndahen nga një lartësi malore prej pak kilometrash, por rruga drejt njëra-tjetrës është e kalueshme dhe mjaft piktoreske. Është një rrugë malore e pyllëzuar dhe së fundmi me qëndra shlodhjeje dhe me shërbim ambulant për udhëtarët e lodhur nga ngjitja. Banorët e zonës e kanë kuptuar leverdinë e këtij shërbimi dhe kanë menduar për këto pika relaksi dhe rimarrje energjishë.theth8
Është një mrekulli që ti shikoni të dy këto zona të mrekullueshme në të njejtin udhetim.
Dhe kjo është e mundur sepse shumë agjenci turistike e ofrojnë këtë shërbim, mjafton të ecini për rreth 6-7 orë dhe kalon nga Valbona në Theth ose anasjelltas.
Ky itinerar përfshin një ngjitje nga Valbona (995 m) në qafën e Valbonës (1759 m) dhe për të zbritur në Theth  në lartësinë 745m mbinivelin e detit.
Ky kalim është një shteg i lashtë që lidhte rajonet fisnore të Shalës dhe Nikaj-Mërturit. Behet fjalë për të ngjitur rreth 1000 m dhe te zbrisni në  800 m.
theth7Gjithe udhëtimi zgjat rreth 14 Km dhe terreni i thyer e malor e zgjat në kohë udhëtimin.
Kalimi Theth – Valbonë  është një ndër udhëtimet më të bukura jo vetëm në Shqipëri, por dhe në botë.
Kjo pjesë nga Valbona në Theth ose anasjelltas është pjesë e “Peaks of The Balkans” Majat e Ballkanit, midis Shqipërisë – Kosovës – Malit të Zi, e cila ka fituar  çmimin “Best trail of The Year” për vitin 2013, nga një ndër organizatat më të njohura në botë siç  është Tourism for Tomorrow.
Vizitore të shumtë nga Europa apo bota, të tërhequr nga kurioziteti I këtij udhëtimi plot aventura, e përshkojnë atë çdo vit në të katër stinët. Këta janë aventurierët e lartësive dhe të turizmit. /a.ke/
https://www.ata.gov.al/kalimi-i-shtegut-theth-valbone-apo-anasjelltas-nje-mrekulli-turistike/

Search

Translate